Thitsar: (၇)ရက်ဇူလိုင်ရဲ့ သမိုင်းကဏ္ဍ

ဖိုးသံ(လူထု)

ရာစုနှစ်ဝက်နီးပါး စစ်အာဏာရှင် အုပ်စိုးမှုအောက်မှာ ရဟန်းသံဃာတော်တွေနဲ့ ကျောင်းသား တွေအပါ ပြည်သူလူထုတွေဆန္ဒပြလို့ အသတ်ခံရတာများလှပါပြီ။ ဒါမေမယ့် (၇)ရက်ဇူလိုင်ကို ရောက်တယ်ဆိုတိုင်း စစ်အစိုးရရဲ့ ပထမဆုံးအစုလိုက်အအုံလိုက် လူသတ်မှုကြီးကို ပြန်လည် ဖော်ထုတ်ပြောဆိုနေကြရတာ ဘာကြောင့်ပါလဲ။ အနာဟောင်းကိုပြန်ဖော်ပြီး အကြောင်းမဲ့ ပြဿနာ ဖော်နေတာလား။ မပြောမဖြစ်လို့ ပြောနေကြတာလား။

(၁)

(၇)ရက် ဇူလိုင်အရေးအခင်းဟာ ဗိုလ်နေ၀င်းအာဏာသိမ်းပြီးလို့ လေးလကြာတဲ့အခါမှာ ပေါ်ပေါက်တာဖြစ် တယ်။ ဒီအာဏာသိမ်းမှုဟာ ခေတ်သစ်ဗမာပြည်သမိုင်းရဲ့ အပြောင်းအလဲအကွေ့ အချိုးကြီးတခုဖြစ်ပါတယ်။ ဗိုလ်နေ၀င်းတို့စစ်အုပ်စုဟာ စစ်အုပ်စုမျိုးဆက်နဲ့ချီပြီး တိုင်းပြည် အာဏာကို သိမ်းပိုက်တော့မယ်၊ တကယ့်ရည်ရွယ်ချက်ကို မပြောဘဲ တိုင်းရင်းသားတွေအပေါ် မတရားစွပ်စွဲပြီး အာဏာသိမ်းခဲ့တာဖြစ်ပါတယ်။ ဒါကြောင့် အာဏာရပထစနဲ့ အဓိကအတိုက်အခံ ဖဆပလတို့ဟာ တွေသွားပြီး(၁၉၅၈ - ၆၀) အာဏာသိမ်းမှုတုန်းကလို ဗိုလ်နေ၀င်းက အာဏာ ပြန်လွှဲလေမလားလို့စဉ်းစားသူစဉ်းစားနဲ့ တုန့်ဆိုင်းနေပါတယ်။ နောက်ပြီး လက်ဝဲဆိုတဲ့(ပမညတ) ထဲကလည်း မနည်းတဲ့လူတွေဟာ ဗိုလ်နေ၀င်းပြောတဲ့ ဆိုရှယ်လစ်စကားတွေကို သွားရည်ကျပြီး စစ်အစိုးရကို ထောက်ခံပြောလာပါတယ်။ နိုင်ငံရေးအရ တစုံတရာရှုပ်ထွေးနေတယ်လို့ ဆိုနိုင်ပါ တယ်။ တချို့သတင်းစာတွေကလည်း စမ်းတ၀ါးဝါးရေးသား ဖော်ပြနေကြပါတယ်။ သူတို့အနေ အဖမ်းခံရမှာနေနဲ့ သတင်းစာတိုက်အပိတ်ခံရမှာကို သတိထားနေကြတဲ့ သဘောလည်းပါ ပါတယ်။

(၂)

ဒီလိုအနေအထားမှာ တကသ နဲ့ ဗကသ တို့ကနေ စစ်အစိုးရအာဏာသိမ်းတာကို ကန့်ကွက်ကြောင်း အတိအလင်းကြေညာလိုက်ပါတယ်။ ဒါဟာအာဏာရပြီးကာစ မာန်တက်နေတဲ့ စစ်အုပ်စုကို အမျက်ခြောင်းခြောင်း ထွက် စေခဲ့ပါတယ်။ အတိုက်အခံနိုင်ငံရေးသမားကြီးတွေတောင် မပြောဝံ့တာကို ဒီမလောက်လေးမလောက်စား ကျောင်းသားလေးတွေကရာရာစစ ပြောရစကောင်း လားဆိုပြီး စစ်ဦးဘီလူးသဖွယ် သမဂ္ဂနဲ့ကျောင်းသားတွေအပေါ် ဦးဦးဖျားဖျား ရမ်းကားရက်စက် ခဲ့တာဟာ အဓိကအားဖြင့် ဒီအကြောင်းကြောင့်ပါ။ သူ့ဘ၀မှာ ကျောင်းသားသမဂ္ဂတွေနဲ့ ယောင်လို့ တောင် မပတ်သက်လို့မှ မပတ်သက်ခဲ့ဘူးတဲ့ ဗိုလ်နေ၀င်းဟာ သမိုင်းဝင် ရန်ကုန်တက္ကသိုလ် ကျောင်းသားများသမဂ္ဂ အဆောက်အဦကြီးကို မိုင်းဗုံးနဲ့ ဖြိုပစ်ခိုင်းတဲ့ဟာက အထက်ကပြောခဲ့တဲ့ နာကျည်းချက်ကြောင့် ဖြစ်တယ်လိုဆိုရင်မမှားပါဘူး။ စစ်မဖြစ်မီက ကျောင်းသားလှုပ်ရှားမှုမှာပါ ၀င်ခဲ့တဲ့ ကျနော့်မိခင်ဆိုရင် အဲဒီတုန်းက ကိုယ့်နားကို မယုံနိုင်လောက်အောင်ဖြစ်သွားပြီး သူတို့နှယ် မိုက်ရိုင်းလိုက် လေလို့ တဖြစ်တောက်တောက်ပြောခဲ့တာ အခုထိ မှတ်မိနေပါတယ်။

(၃)

ဗိုလ်နေ၀င်းက ကျောင်းသားတွေကို သတ်ပြလိုက်တာဟာ တကယ်က တပြည်လုံးကို ခြိမ်းခြောက်လိုက်တာ ဖြစ်ပါတယ်။ ဓားဓားချင်း၊ လှံလှံချင်းရင်ဆိုင်မယ်လို့ ဒေါသမထိန်းနိုင်ဘဲ ပြော တဲ့ အထိဖြစ်ခဲ့တယ်။ ဒီစကားကြားတော့ လက်နက်မဲ့ကျောင်းသားတွေအပေါ် မောက်မောက်မာမာ စိန်ခေါ်နေတဲ့ တိုင်းပြည်ခေါင်းဆောင်ကြီးကိုလည်း လူထုကအံ့သြကြရပါတယ်။ အမှန်က ကျောင်းသားသမဂ္ဂတွေအပေါ်မှာထားရှိတဲ့ ဗိုလ်နေ၀င်းရဲ့ အာဃာတဟာ သမိုင်းနဲ့ချီပြီးသူ့ရင်ထဲ၊ ခေါင်းထဲမှာ ကိန်းအောင်းနေခဲ့တာဖြစ်ပါတယ်။ သခင်အောင်ဆန်းအပါ သူရဲ့နိုင်ငံရေးပြိုင် ဘက်တွေ လို့ သူသတ်မှတ်ထားသူတွေအားလုံးလိုလိုဟာ သမဂ္ဂမှာထိပ်ပိုင်းက လှုပ်ရှားခဲ့သူတွေဖြစ်ပါတယ်။ နောက်ပြီး တို့ဗမာအစည်းအရုံးမှာ သူဆရာ သခင်ဗစိန် ၊ သခင်ထွန်းအုပ်တို့နဲ့အပြိုင် ဆရာကြီး သခင်ကိုယ်တော်မှိုင်းရဲ့ ကျောထောက်နောက်ခံအင်အားဟာ ကျောင်းသားသမဂ္ဂ၀င်ဟောင်းတွေ မဟုတ်လား။ ဒီလူသတ်ပွဲဟာ အဲဒီရန်ငြိုးတွေကို ဖောက်ခွဲလိုက်တာလို့ပြောရင်လည်း မမှားပါဘူး။ သူတလျောက်လုံးအရှုံးပေးခဲ့ရတဲ့ ကျောင်းသားသမဂ္ဂကို ပြန်အနိုင်ယူတဲ့သဘောဖြစ်ပါတယ်။

(၄)

ဒီလူသတ်ပွဲဟာ ကျောင်းသားတွေကိုသာ ဦးတည်တာမဟုတ်ဘဲ တပြည်လုံးကို မြင် တယ်မဟုတ်လား၊ ကြည့်ထားကြလို့ စံပြလုပ်ပြလိုက်တာပါ။ တိုင်းပြည်ရဲ့ အညွန့်အဖူးလို့ဆို့တဲ့ အသက်ငယ်ရွယ်တဲ့ ကျောင်းသားတွေကိုတောင် သတ်ရဲတယ်။ ကျန်တဲ့အလွှာအသီးသီးကိုတော့ ပြောစရာမလိုဘူးဆိုတဲ့ အဓိပ္ပါယ်ပါ။ ဒီလူသတ်မှုဟာ နောင်စစ်အစိုးရအဆက်ဆက်အတွက် ရဲရဲ သတ်ဖြတ်ရဲတဲ့အစဉ်အလာကို ထူထောင်ပေးလိုက်တာ၊ ရဲဆေးတင်ပေးလိုက်တာဖြစ်ပါတယ်။ အမှန်ဝန်ခံရရင် ကျနော့်တဦးချင်ရော၊ တခြားကျနော်သိသမျအဖွဲ့အစည်းတွေရော လူပုဂ္ဂိုလ်တွေပါ ဗိုလ်နေ၀င်း ဒါလောက်မိုက်မိုက်ရိုင်းရိုင်းလုပ်လိမ့်မယ်လို့ မျော်လင့်မထားတာအမှန်ပါ။ သာမန် ဗမာ ပြည်သားတယောက်အနေနဲ့ ဒါလောက်ရက်စက်လိမ့်မယ်လို့ မတွက်မိခဲ့ပါဘူး။ ဒီလိုနဲ့ ဒီအဖြစ် အပျက်ပေါ်ပေါက် လိုက်တဲ့အတွက် အားလုံးဟာစဉ်းစားမှုနည်းနာ၊ လက်တွေ့ပြင်ဆင်မှုစတာတွေ အားလုံးမှာ အရင်ကနဲ့ မတူတာတွေ ချည်းဖြစ်ကုန်ပါတယ်။ ဒီလိုနဲ့ တချို့ကျောင်းသား ခေါင်းဆောင် တွေ တောခိုတာအထိ ဖြစ်ခဲ့ပါတယ်။

(၅)

ကျောင်းသားသမဂ္ဂတွေဟာ (၁၉၆၂) ခုနှစ်ကစပြီး သမိုင်းမှာ ပထမဆုံးအဖြစ် မြေအောက် ခိုခဲ့ရပါတယ်။ ဒီအရင်တုန်းက ကျောင်းသားခေါင်းဆောင်တွေ အဖမ်းခံရတာရော အဖမ်းမခံရတာ ရော အဖမ်းမခံရအောင် ရှောင်ကြ ရှားကြတာပါရှိပါတယ်။ ဒါပေမယ့် ကျောင်းသားသမဂ္ဂတွေ ကတော့ ဆက်လက်လည်ပတ်နေခဲ့တယ်။ ကျန်နေသူတွေ ဖမ်းထားသူတွေကို ပြန်လွှတ်ပေးဖို့၊ ကျောင်းထုတ်ခံရသူတွေကို ကျောင်းနေခွင့်ပေးဖို့ ဆက်တိုက်ပွဲဝင်ကြပါတယ်။ ဒါပေမယ့် (၁၉၆၂) ခုနှစ်နောက်မှာကျတော့ အဓိကသမဂ္ဂရုံးများလို့ဆိုရမယ့် ရန်ကုန်တက္ကသိုလ်ကျောင်းသားများ အဆောက်အဦကြီးနဲ့ မန္တလေးတက္ကသိုလ်က သမဂ္ဂတဲကြီးကို စစ်အစိုးရက ဖြိုပစ်လိုက်ပြီး ဘယ်သူ့ကိုမှ လှုပ်ရှားခွင့် မပေးတော့ပါဘူး။ အဲဒီနောက် (၁၉၆၃) ခုနှစ်မှာ မဆလအစိုးရက တောတွင်းနဲ့ စေ့စပ်ဆွေးနွေးဖို့ လုပ်တယ်ဆိုတဲ့ အခါမှာ အဖမ်းခံထားရသူတွေကိုလည်း တော်လှန် ရေးကောင်စီအစိုးရက လွှတ်ပေးရပါတယ်။ အဲဒီနောက် ပုန်းအောင်းနေတဲ့ကျောင်းသားတွေလည်း ပြန်လွတ်လာကြပြီး ကျန်နေတဲ့ လူတွေနဲ့အတူ သမဂ္ဂလုပ်ငန်းများကို ပြန်စကြပါတယ်။ ဒါပေမယ့် ဒါဟာ လအနည်းသာခံပါတယ်။ ဗိုလ်နေ၀င်းက စေ့စပ်ဆွေးနွေးရေးမျက်လှည့်ပွဲ တော်ချိန်တန်ပြီလို့ ဆုံးဖြတ်လိုက်တာနဲ့ စာပွဲဝိုင်းတွေကို ဖျက်သိမ်းပြီး တောတွင်းအင်အားစုတွေကို တောထဲ ပြန်ခိုင်း ကာ မြို့ပေါ်မှာလူဖမ်းပွဲတွေ အကြီးအကျယ်လုပ်တော့တာပါ။ အဲဒီလိုနဲ့ ကျောင်းသားသမဂ္ဂတွေ မြေအောက်လျိုးသွားရတာဟာ ဒီနေ့အထိပါပဲ။

(၆)

ဗိုလ်နေ၀င်းက ဂမူးရူးထိုးနဲ့ သမဂ္ဂအဆာက်အဦကြီးကို ဖြိုခွဲလိုက်တာဟာ ဗိုလ်နေ၀င်း တို့ကို သမိုင်းတရားခံအဖြစ် သေတဲ့အထိ တောက်လျောက် တစ္ဆေခြောက်ခဲ့ပါတယ်။ နောက်ပိုင်းမှာ သူတို့ချင်းအပြန်အလှန်လက် ညှိုးထိုးကြရင်း ဗိုလ်အောင်ကြီးနဲ့ကွဲရာမှာ အချက်အလက်ဖြစ်လာ ခဲ့ပါတယ်။ တကယ်ဆို ဒီအချက်က အတွင်းသိဖြစ်တဲ့ ဗိုလ်အောင်ကြီးအနေနဲ့ ဗိုလ်နေ၀င်းအပေါ် နိုင်ဖဲ တချပ်ဖြစ်ရမှာပါ။ ဒါပေမယ့် သတ္တိမရှိတဲ့ ဗိုလ်အောင်ကြီးက ဒီဖဲချပ်ကို ဗိုလ်နေ၀င်းဆီမှာ မျက်နှာချိုသွေးရေးအတွက်ပဲ အသုံးချသွားခဲ့ပါတယ်။ သမိုင်းရဲ့ဖြစ်ရပ်မှန်တွေကို ဖေါ်ထုတ်လောက် အောင် သတ္တိမရှိကြောင်းပြသသွားပါတယ်။ သမိုင်းကိုပြန်ကြည့်ရင် ဗိုလ်နေ၀င်းအပါအ၀င် ဘယ် စစ်အာဏာရှင်မဆို သူတို့ကိုယ်တိုင်ဆုံးဖြတ်တာပါ။ တော်တော်များများက သူတဦးတည်း ဆုံးဖြတ် တာပါ။ ဘယ်သူမှ ပြန်ပြောဝံ့တာမဟုတ်ပါဘူး။ ဒါကို အတွင်းသိလို့ဆိုရမယ့် ကတော်တွေက ပုဂံ သီရိပစ္စယာဟော်တယ်မှာ အချင်းချင်းပြောကြတာကိုကြားရပြီး ဗိုလ်နေ၀င်းတခါထပ်ပြီး သွေးလန့်ရ တယ် မဟုတ်ပါလား။

(၇)

(၇) ရက်ဇူလိုင် ကျောင်းသားသပိတ်ပွဲကြီးပြီးတဲ့အခါမှာ ပြည်သူလူထုအတွင်း စစ်အစိုးရနဲ့ ပတ်သက်လို့ အမြင်ရှင်းသွားကြပါတယ်။ အဲဒီကာလက နိုင်ငံရေးနဲ့ပတ်သက်လာရင် ဒီလူသတ်ပွဲ အပေါ် ရှုမြင်ပုံ၊ ရပ်တည်ချက်ပုံ အပေါ်မူတည်ပြီး အကဲဖြတ်ကြပါတယ်။ ဒါဟာ အဲဒီတုန်းက လူ ပုဂ္ဂိုလ်နဲ့ အဖွဲ့အစည်းတွေကို တိုင်းတာတဲ့စံ တခုပါပဲ။ ပြည်သူလူထုဟာ မဆလနဲ့ ပေါင်းတဲ့ လူတွေ အပေါ် ဒီကိစ္စကြီးပေါ်ပြီးနောက် ပိုပြီးမေတ္တာပျက်သွားပါတယ်။

မြေပေါ်လက်ဝဲသမားတွေထဲမှာလည်း မဆလနဲ့ပေါင်းသူနဲ့ မပေါင်းသူရယ်လို့ အတိအလင်း ကွဲပြားသွားပါတယ်။ မဆလနဲ့တွဲသွားသူတွေအထဲမှာ နိုင်ငံရေးအစဉ်အလာကြီးသူတွေ၊ နာမည်ကြီး သူတွေပါကြပါတယ်။ ဒါပေမယ့် သူတို့ခမျာ အဲဒီခြေလှမ်းကစပြီး ပြည်သူလူထုနဲ့ ကင်းကွာသွား လိုက်တာ နိုင်ငံရေးအရ လုံးလုံးပြန်နလံမထူတော့ပါဘူး။ ဒါကြောင့် ဒီအရေးအခင်းဟာ အဲဒီအခါက ဘီလူးစည်း လူစည်းခွဲရာမှာလည်း အင်မတန်အရေးပါတဲ့အခန်းက ပါရှိခဲ့တယ်လို့ဆိုနိုင်ပါတယ်။

(၈)

ဒါကြောင့် (၁၉၆၂)ခုနှစ် အာဏာသိမ်းမှုဟာ ဗမာပြည်နိုင်ငံရေးဇာတ်ခုံရဲ့ အခင်းအကျင်း တော်တော်များများကို ပြောင်းလဲသွားတယ်လို့ဆိုရင် မမှားပါဘူး။ (၁၉၆၆) ခုနှစ်မှာ ကျနော်ထောင် ထဲကို ရောက်တော့ ထောင်ထဲမှာ ကျနော့်အရင်ရောက်နှင့်တဲ့ သံဃာတော်တွေ၊ ကျောင်းသားတွေ၊ နိုင်ငံရေးသမားတွေရှိတယ်။ ဒါပေမယ့် အရင်တုန်းက နိုင်ငံရေးအကျဉ်းသားအဖြစ်တွေ့ရလေ့ရှိတဲ့ ဆိုရှယ်နီတို့၊ ပြည်သူ့ရဲဘော်တို့ မတွေ့ရသလောက်ဖြစ်နေပါတယ်။ နောက်တနှစ်လောက်နေမှ ပြည်သူ့ရဲဘော်ထဲက (အဲအချိန်မှာ မလညပ- မြန်မာပြည်အလုပ်သမားညီညွတ်ရေးပါတီလို့ နာမည် ယူထားတဲ့) ပြည်သူ့ရဲဘော်ကခေါင်းဆောင်ဟောင်းတချို့ လက်နက်ကိုင်တော်လှန်ရေးထဲပြန်ဝင်ဖို့ စည်းရုံးလှုပ်ရှားကြလို့ အဖမ်းခံရပြီး ထောင်ထဲရောက်လာပါတယ်။ ဗိုလ်တင့်တယ် ခေါင်းဆောင်တဲ့ အဖွဲ့ပါ။ ဒီလိုနဲ့ ထောင်ထဲမှာတိုက်ပွဲတွေဖေါ်ကြတဲ့အခါကျတော့ မန္တလေးခရိုင်ဗကသက ကျနော်တို့ ဟာ ဖဆပလတို့၊ ပထစ၊ မလညပ၊ အလံနီစတာတွေနဲ့ လက်တွဲပြီး ထောင်အာဏာပိုင်တွေကို တိုက်နေတာတွေ့လာရပါတယ်။ ဗမာပြည် နိုင်ငံရေးရဲ့ အဓိကပတိပက္ခဟာ ပြောင်းသွားပြီကိုး။

(၉)

နောက်ဆုံးတချက်အနေနဲ့ပြောရရင် ကျောင်းသားတွေဟာ သမိုင်းမှာမကြုံဖူးတဲ့၊ မစဉ်းစား မမျော်လင့်ခဲ့တဲ့ ရက်စက်သတ်ဖြတ်မှုကြီးနဲ့ အဖိနှိပ်ခံလိုက်ရပေမယ့် နောက်တွန့်ခြင်း လုံးဝမရှိဘဲ သမဂ္ဂလုပ်ငန်းတွေကို မျိုးဆက်တဆက်ပြီးတဆက်ရတဲ့နည်းပေါင်းစုံနဲ့ ဆက်လက်သယ်ဆောင် နေကြဆဲဆိုတဲ့ အချက်ပါပဲ။ ဗမာပြည်မှာ ကျောင်းသားဆိုတာရှိနေသရွေ့ ကျောင်းသားသမဂ္ဂ ဆိုတာ တည်ရှိနေမှာပါပဲ။

ဖိုးသံ(လူထု)